Ólöf S. Björnsdóttir

2003-07-10T08:38:00.000-02:00

Sæl öll

Tíminn líður á undrahraða og sumarið er hálfnað enda datt frúnni það snallræði í huga að skrá sig á sumarnámskeið og tíminn því mældur í verkefnaskilum í vikulok. Nú er að líta á björtu hliðarnar því Lára er frá með skil inn í WebCT "einungis" lokaverkefnið eftir hjá henni (eins og það sé eitthvert smá mál en best er að hafa þetta á léttu nótunum áður en maður …!)

Námskeiðið hjá Stefáni er hálfnað, þ.e. verkefnaskilin til hans, en það sama og hjá Láru, lokaverkefnið sem verður að ráðast í síðar í sumar.

Hvað um það, það er bara að þrauka og til að breyta út af þessu daglega námi og vinnu þá lagði land (og sjó) undir fót og skellti mér á goslokahátíð í Vestamannaeyjum. Þetta voru þriggja daga hátíðarhöld sem fóru fram á hinn prúðmannlegasta hátt í ýmsum veðrum eins og von er á í Eyjum. Ég skemmti mér konunglega enda bjó ég á sínum tíma í 7 ár í Eyjum en minn ágæti eiginmaður er frá Vestmannaeyjum og má því segja að gosið hafi verið örlagavaldur í lífi okkar beggja á sínum tíma.

Mikið var talað um „herbrúði“ hér í den en nú tel ég að best að varpa fram nýju nýyrði sem nær yfir mig og mína líka frá þessu tímabili en það er orðið „gosbrúður“. Rök mín fyrir þessu er að þegar herinn kom og náði sér í konur þá fengu þær áðurnefnt viðurnefni og því ekki að bæta orðinu „gosbrúður“ inn því hvað gerðist ekki þegar fullt af efnilegum Eyja-peyjum komu í „land“ :-)

Læt þessar hugleiðingar duga í bili og kveð

2003-06-15T10:58:00.000-02:00

Smá fréttir af mér og mínum á þessum yndislega sunnudegi! Verð að taka svona til máls þar sem ég er að jafna mig eftir „stór“ hrun tölvunnar í gær. Sá fyrir mér að vetrarvinnan færi fyrir lítið þar sem afritunartaka hefur verið með slappara móti og allt dótið geymt á harða diskinum. Hvað um það ég slapp með skrekkinn og hef setið við langt fram eftir nótu sem og í morgun við að taka afrit. Sé fyrir mér að kvöldið og næsta nótt fari í að strauja elskuna og setja upp á nýtt, eða jafnvel ég kynni mér á morgun hvað nýtt móðurborð og STÓR harður diskur kostar og láti hina róa.
Von er á elsta syninum heim úr þriggja vikna útskriftar-reisu til Mexíkó og Kúbu. Upphaflega ætluðu verðandi byggingatæknifræðingar í reisu til Kína en hún var blásin af sökum SARS og hitt ákveðið. Verð að segja frá því að ég lánaði drengnum (26 ára og býr enn heima) stafrænu myndavélina mína og ætlaði hann að senda myndir heim frá Mexíkó. Hvað um það á fjórða degi hringir hann og lætur okkur vita að það sé ekki mikið um nettengingar í Mexíkó hvað þá að hann geti komist í nógu hraðvirka tengingu til að senda allar myndirnar. Það hló púki í illa innrættu móðurinni sem var búin að vara drenginn við en hann trúði henni ekki, er enn á því stigi að allur heimurinn hljóti að vera með svipaða tækniuppbyggingu og Ísland. Höfum máltækið „Svo lengi lærir sem lifir“ í huga hér!
Yngsti sonurinn (fæddur '86) fékk vinnu (í gegnum klíku) og þá er sá höfuðverkur úti. Getur því m.a. keypt sjálfur áfyllingar í GSM frelsið héðan í frá.
Ekki var sama heppnin yfir dótturinni (24 ára flutt að heiman). Fyrirtækið sem hún var að vinna hjá lagði upp laupana svo hún er nú atvinnulaus og þakka ég fyrir það að hún er með aðra fyrirvinnu en foreldrana. (Ekki fallega sagt en satt engu að síður).
Nú má heimfæra ofangreindar pælingar yfir á stefnur og tel ég að þær tilheyri svokallaðri „Raunsæisstefu“.
Kveð í bili og sný mér að verkefnavinnu áfanganna sem ég er skráð í sem munu eflaust taka sinn tíma á þessu sumri.

2003-06-09T13:38:00.000-02:00

Nú er áfanganum lokið og loksins er ég búin með það sem ég ætlaði mér, þ.e. ef hægt er að segja að einhverju sem liggur á hinum síbreytilega Vef sé lokið.
Hér er krækja í skilasíðuna mína. Frá henni eru tengingar í öll verkefnin sem voru unnin í kúrsinum.
Ég samþætti vefleiðangur og lokaverkefni í samvinnu við Sólveigu Friðriksdóttur og gerði hún það sama.
Umfjöllunarefni hjá mér var Útlit og umbrot og hjá Sólveigu var það uppsetning ritgerða.
Kveð alla og segi takk fyrir samveruna.

2003-05-22T00:26:00.000-02:00

Heilsan óðum að færast til betri vegar. Fór aðeins út í sólina í dag og naut þess að vera í smá leti. Nú er að taka sig saman í andlitinu og halda áfram með verkefnavinnuna og var ég að ljúka við smá ættarvef, en þar setti ég inn m.a. ítarlegt æviágrip móðurömmu minnar. Það er byggt á viðtali sem móðursystir mín tók við ömmu árið 1978. Ég fékk leyfi hjá henni og birti það allt. Þetta er skemmtileg aflesning, en að sjálfsögðu er ég ekki í stakk búin til að dæma um það, en læt það flakka.
Það er krækja í vefinn sem ég var að útbúa fyrir Átthagafélag Sléttuhrepps og þar er einnig áhugaverð lesning um Aðalvík, svo ekki sé minnst á myndasíðuna en ég setti inn nokkrar myndir sem ég tók sl. sumar.
Læt þetta duga í bili.

2003-05-18T11:11:00.000-02:00

Á þessum yndisfagra sunnudegi sit ég hér við tölvuna mína og er að koma smá bloggi á blað til að láta vita að ég er enn við lýði.
Síðastliðinn miðvikudag fór ég í skurðaðgerð á St. Jóseps í Hafnarfirði og þrátt fyrir að slíkt sé ekki tilhlökkunarefni þá verð ég að geta þess hve það er yndislegur staður. Allt svo heimilislegt og starfsfólkið einstaklega elskulegt. Til að kóróna allt saman þar var þar innandyra „grískur ...!“ sem reyndist vera deildarlæknir á handlækningadeild og hafði allt til að bera, útlit, umhyggju fyrir sjúklingum og elskulegheit. Á slíkum stundum læðist að manni ósk að vera ca 20-30 árum yngri en maður er, annars verð ég að segja að ég er hæst ánægð með mitt goð sem hefur staðið mér við hlið sl. 30 ár, en það gerir ekkert til að láta smá dagdrauma fljóta með öðru hverju :-)
Það er skemmst frá því að segja að ég er ekki til stórræðnanna þessa daga en með hækkandi sól þá vonandi hefst þetta allt saman því það sem skiptir máli er að koma sér til heilsu á ný og hitt bíður bara á meðan.

2003-05-11T20:20:00.000-02:00

Síðastliðinn föstudag fór ég á „reunion“ mót. Tilefnið var að halda upp á fullaðarpóf hjá árganginum 1953 módel. Eins og oft vill verða þegar er langt um liðið þá þekkjast ekki allir aftur á augabragði. Því má líkja fyrstu klukkustundinni við púsluspil þar sem reynt var að bera saman andlit úr minningunni, með aðstoð gamalla bekkjarmynda, og þeirra sem mættu. Þetta reyndist hin besta skemmtun og þegar upp var staðið þá hafðist þetta allt. Við höfðum öll fullorðnast á mismunandi vegu en þannig er nú einu sinni lífið það fer um okkur misjöfnum höndum. Hvað um það þegar allir voru farnir að þekkja hvor aðra aftur eins og fyrr á öldum þá var ekki að merkja að 20 ár voru liðin síðan við hittumst síðast og sumir jafnvel að hittast í fyrsta sinn frá því að við lukum 2. bekk í gaggó. Ég tók mikið af myndum og ætla að setja þær inn á heimsíðuna mína við fyrsta tækifæri og þar má glöggt sjá hve vel allir smullu saman.
Laugardagurinn fór í eitt það skelfilegasta migerikast sem ég hef fengið lengi og ekki get ég kennt neinni kapavínsdrykkju þar um því einu veitingarnar sem frúin innbyrti á föstudagskvöldinu voru tvö sódavatnsglös enda minnug uppákomunnar um daginn. Náði síðan að rísa úr rekkju kl. 21 og þá dró bóndinn mig til að kjósa.
Fór í gönguferð kringum Grafarvoginn í morgun í yndislegu veðri, en nú hef ég setið við tölvuna frá hádegi í verkefnavinnu og smám saman er að komast heildarmynd á það sem eftir er.

2003-05-06T20:32:00.000-02:00

Eftir langan vinnudag var ánægjulegt að vera boðin í opnunargilli Nordica hótelsins milli 17-19. Reyndar mætti ég ekki fyrr en um kl. 18 en mikil breyting hefur átt sér stað frá þeirri Hótel Esju sem þarna var. Glæsileg salarkynni og yndisleg herbergi. Veitingarnar sem voru bornar fram voru hver annarri betri þannig er maður verður að vera þakklátur fyrir að lenda ekki oft í slíkum kræsingum því annars þyrfti að endurnýja fataskápinn oftar en nú er. Það er nokkuð furðulegt þegar á það er litið hversu fötin eiga það til að hlaupa inn í skáp. Ætli það sé eitthvað í sambandi við rakastigið? Get ekki fullyrt það, kannski veit það einhver.
Nú er það þessi blákaldi aftur tekinn við og nú er setið við í verkinu endalausa … sem vonandi fer að sjá fyrir lokin á.

2003-05-05T20:03:00.000-02:00

Eins og kom fram í síðasta bloggi fór ég í langt helgarleyfi til Vestmannaeyja. Lystisnekkjan Herjólfur lagði frá Þorlákshöfn um hádegisbil á fimmtudegi í yndislegu verðri. Það undarlega var að þegar til Eyja kom þá var snjór yfir öllu sem er mjög sérstakt á þessum árstíma. Hvað um það það er enginn verri þó smá snjór og kuldi sé, því sól skein í heiði og ekki mikill vindur. Til að kóróna allt þá var ég með bóndann hjá mér sem er hinn vænsti hitagjafi ef á þarf að halda.
Þar sem minn bóndi er innfæddur Eyjapeyi þá var notalegt að eyða helginni í góðra vina hóp og nutum við þess að láta dekra við okkur sem konungborin. Engin eldamennska, ekkert uppvask, ENGIN HEIMILISSTÖRF í 4 daga, þvílíkur lúxus.
Yfirgáfum sælureitinn á sunnudag og sigldum aftur til baka með fríðu föruneyti Kvennakórs Reykjavíkur, en þær höfðu eytt helginni í Eyjum við söng, gleði og glaum, eins og við!
Þegar heim var komið á sunnudagskvöldið þá höfðu elskurnar mínar (börnin) eldað fyrir „gamla settið“ þannig að draumurinn hélt áfram.
Nú blákaldur raunveruleikinn tekinn við og verkefnin bíða eftir því að á þeim sé tekið og þeim lokið. Til marks um að hversdagslífið sé búið að ná yfirhöndinni aftur þá má geta þess að ég eldaði mat áðan fyrir fjölskylduna :-)

2003-05-01T00:43:00.000-02:00

Hef ákveðið að fara í lagt helgarleyfi og ferðast suður á bóginn sjóleiðina til Vestmannaeyja. Verð þar fram á sunnudagskvöld með það eitt í huga að slappa af. Ef ég kemst í tölvu sendi ég línu annars læt ég frá mér heyra á sunnudagskvöld eða mánudag.

2003-04-29T17:56:00.000-02:00

Nú er liðinn nokkur tími síðan ég bloggaði síðast. Að hluta til má rekja það til leti og að hluta til veikinda yfir síðustu helgi þar sem erfitt reyndist að reisa höfuð frá kodda sökum mikillar kampavínsveislu á föstudagskvöldinu, en eins og maðurinn minn sagði þegar hann sótti mig: Þú ert græn í framan! þá lyndir mér illa við kampavínið. Það tók sem sé tvo daga að jafna sig og þótti mér illa farið með helgina.
Nú er ég búin að vera að reyna að bæta mig og er lagt kominn með vef-/kennsluleiðangur, en þá er það líka hvenær er maður ánægður með afraksturinn og telur sig vera búinn?
Hef oft velt því fyrir mér hvort ekki sé hægt að setja lög eða reglugerð sem bannar vinnu þegar veðrið er eins og það er núna. Gæti hugsað mér langa göngu í þessu yndislega veðri, en einhvern veginn er þetta tímabil lok apríl og maí alltaf gott, enda ber að hafa í huga að það er prófatímabil og kennarar (og við sem nemendur) oft mjög uppteknir á þessum árstíma.

2003-04-21T10:29:00.000-02:00

Rólegir og góðir páskar að enda. Eyddi föstudeginum í tiltekt og bókhald. Laugardagurinn var leti og smá undirbúningur undir lokaverkefni þ.e. reynt var að kortleggja það síðan er að sjá hvernig gengur að vinna eftir því. Vandinn verður eflaust að takmarka sig.
Páskadagur var fjölskyldudagur hjá mér. Fór í langan rólegan göngutúr með bóndanum upp úr hádegi. Ég hafði boðið móður minni í kvöldmat og þar sem hún er fötluð í hjólastól þá nýtum við okkur ferðaþjónustu fatlaðra þegar hún kemur í heimsókn. Ég verð að segja að ferðaþjónusta fatlaðra á heiður skilið því án undantekninga veita þeir frábæra þjónustu og eru einstaklega hugulsamir við þá sem þeir eru að þjónusta. Nú er liðinn upp annar í páskum og ég sit við bloggið (enn á náttfötum) og er að reyna að herða upp hugann til að setjast niður við verkefnavinnu í stað þess að fara út að ganga :-)

2003-04-17T21:15:00.000-02:00

Byrjaði daginn á að fara í göngu um Elliðaárdalinn. Dró bóndann og táninginn á heimilinu með mér og var ákveðið að ganga fræðslustíginn. Ekki gekk það áfallalaust fyrir sig því mikil bleyta var í dalnum og varð því frá að hverfa að taka þessa leið og ákveðið í staðinn að ganga upp með eystri kvíslinni. Ég hafði ætlað að taka hringmynd í dalnum en það óhapp varð að ég steig á misfellu og endasentist á hausinn og myndatakan lak þar með út úr minninu og verður að bíða betri tíma.
Eftir verslunarferð í Bónus fór ég í verkefnavinnu og las póst. Mín beið m.a. bréf frá Salvöru þar sem hún kom inn á vangaveltur mínar úr síðasta bloggi varðandi umfang áfangans (5+++ einingar) og benti á að verkefnin væru mörg en smá. Þetta er mikið rétt hjá henni og skal ég taka alla sök á mig því eins og ég sagði í afsökunarbréfi til hennar, þá er það mitt böl að vera haldin ákveðinni fullkomnunaráráttu sem gerir það að verkum að eflaust eyði ég of miklum tíma í verkefnin.
Það sama á við þar sem ég er að fjalla um upptökuna hjá Sibbu, það er ekki á nokkurn hátt verið að vega að einum né neinum nema mér sjálfri. Ég var með of mikinn texta sem þurfti að lesa upp, fór því á hundavaði yfir þau atriði sem ég áleit vera aðaltriði með tilheyrandi hiki og þögnum þannig að ég get ekki ímyndað mér að þessi upptaka hafi verið glæsileg, það verður bara að bíða og sjá :-)
Enn og aftur var ég ekki að vega að neinum nema mér sjálfri og best að reyna héðan í frá að ritskoða sjálfan sig með tvíræðnina og hafa þetta bara klippt og skorið!
Hætt í bili og ætla að sinna bóndanum og horfa á restina af Notting Hill með hjartaknúsaranum Hugh Grant og hinni yndisfögru Juliu Roberts.

2003-04-15T22:27:00.000-02:00

Nú er búið að sitja við eftir áfall síðustu staðbundnu lotu. Úff - ég hélt að ég ætti ekki svona mikið eftir og sé nú að það var ekki ofsögum sagt að áfanginn væri 5+++ einingar. Hvað um það það þýðir ekkert annað en að duga eða drepast og þar sem úrsagnartíminn er liðinn er það því að duga og bretta upp ermar :-)
Hef lokið við að skipuleggja ferilmöppuna (Digital Portfolio) og skilasíðu (Main Digital Portfolio).
Einnig lauk ég við að gera kennsluefni á vef (On line learning) og setti upp á vefsíðu umjöllun mína um UT-2003 (sama og ég var búin að setja hér inn á bloggið). Ennfremur ákvað ég úr því að ég væri komin í þennan ham að setja umfjöllunina um rannsóknina hjá Sólveigu sem og hugleiðingarnar sem fylgdu í kjölfarið á WebBoard.
Er því nokkuð ánægð með mig þessa dagana, en verð að viðurkenna að enn hef ég ekki fengið botn í hvernig ég á að ljúka við glærusýninguna, þ.e. að tengja saman mynd og hljóð. Ég er tilbúin með glærurnar hér heima, búin að lafæra allan texta en hef ekki að mér vitandi aðgang að þessari heldur en ekki glæsilegu upptöku, eða hitt þó heldur og bíð því átekta.

2003-04-10T02:34:00.000-02:00

Minna hefur orðið úr bloggi en til stóð þessa vikuna. Ástæðurnar eru aðallega tvær, skemmtanalífið og tölvan.
Í gær fór ég í boð sem haldið var fyrir kanadísku sagnaþuluna Ruth Christie, en hún er stödd hér á landi í boði Þjóðræknisfélaga Íslands og Norður-Ameríku. Boðið tókst mjög vel og Ruth gerði sér far um að heilsa öllum og eiga við þá nokkur orð. Vel var veitt og þegar heim var komið um kl. 19:30 þá settist frúin niður fyrir framan sjónvarpið og síðan ekki söguna meir. Náði að dragast inn í rúm um kl. 21 og vaknaði síðan við óveður kl. 04:00 því þá var minn svefntími (í miðri viku) liðinn.
Ætlaði að bæta upp letina og blogga um daginn en þá var það blessuð tölvan mín enn og aftur að rífast við mótaldið þannig að ekki náðist samband við umheiminn. Ekki fékk ég frið til að reyna að laga það því nú var það sonurinn 16 ára sem varð að klára verkefni sem átti að skilast kl. 18, nema hvað móðirin lét undan drengnum sínum. Annað áfall kom þegar dóttirin (24 ára) sendir neyðarkall til móðurinnar og biður hana að hjálpa sér að útbúa lógo sem hún eigi að skila fyrir myndlistaráfanga á morgun. Þá var kvöldið farið en í skiptum fyrir lógóið fékk ég tengdasoninn í heimsókn og lét hann endurtengja mótaldið. Þetta gekk allt nokkurn veginn snuðrulaust fyrir sig, nema að frúin á heimilinu komst í sína verkefnavinnu kl. 1:30. Nú þegar klukkan er orðin 4:30 eru glærurnar tilbúnar fyrir morgundaginn. Vefleiðangurinn er nokkurn veginn tilbúinn, rannsóknin hjá Sólveigu Jakobsdóttur búin og búið að skila á netið og skýrslu til hennar. Núna vonast ég til að ná um fjögurra tíma svefni því annars sef ég í tímunum á morgun í KHÍ.

2003-04-05T09:38:00.000-02:00

Þegar þessi orð eru rituð sit ég á bókasafni KHÍ að leita að nánara ítarefni fyrir verkefnavinnu. Því miður hefur minna orðið úr verkefnavinnu þessa vikuna en til stóð því bóndinn minn fór í aðgerð á miðvikudeginum (er enn óvinnufær heima) og hvernig sem á því stendur þá finnst sumum skrýtið að tölvan skuli hafa þetta aðdráttarafl þegar annað er í boði :-)
Ekki þýðir um þessa staðreynd að deila og þá er lítið annað að gera en að hafa í huga orðtækið „Köld eru kvennaráð“ og bóndinn verður að sætta sig við það a.m.k. það sem eftir lifir annar að hann verður að deila mér með tölvunni a.m.k. þegar hann brýtur upp „normið“ og er of mikið heima!
Hvað um það þá á þessi elska mín ekkert nema það besta skilið en svona er lífið, hver segir að það sé sanngjarnt?

2003-04-01T19:07:00.000-02:00

Dagur daganna þar sem frjálslega er farið með sannleikann!
Hafði gaman af fréttunum í kvöld þar sem fjallað var um uppboð á fölsunum og þori að veðja að þetta er fyrsta aprílgabb. Svona smá léttleiki í annars grámyglulegum degi er það sem fær hann tila að ljóma aftur.
Held (réttara væri að segja veit) að ég þjáist af langvarandi rit- og hugmyndastoli. Með öðrum orðum, orkan er að renna út í sandinn og eflaust spilar inn í daglegt amstur sem hefur, a.m.k. þessa önn verið í erfiðari kantinum og lítt sér fyrir endann á.

2003-03-30T23:08:00.000-02:00

Eyddi hluta af helginni í að reyna að leggja niður fyrir mér hvernig í ósköpunum ég á að ljúka öllum verkefnaskilum áður en önninni lýkur. Það hlýtur að þurfa að fara saman og því verður að nýta tímann eins vel og hægt er. Bóndinn minn að fara í aðgerð á miðvikudag og ég fæ frí í nokkra daga til að hjúkra honum. Mun því reyna að samnýta það frí í verkefnavinnu.
Hér eru slóðir í UT-fagmennskuna á ensku og á dönsku.

2003-03-29T21:59:00.000-02:00

Laugardagskvöld. Vaknaði upp við vondan draum, hafði gleymt að setja slóðina í verkefni Láru og hér kemur hún UT-fagmennska .
Stend enn í stríði við vélina mína vegna ofhleðslu en sökum ferminganna þessa og næstu helgi þá sé mér ekki fært að enduruppsetja hana eins og ráð var fyrir gert því sú aðgerð getur tekið heilan dag og jafnvel lengur. Það er líka best að játa það að þetta er ekki það skemmtilegasta sem er gert því oft endar það svo að allt sem getur farið úrskeiðis fer úrskeiðis og þá er ekki bara verið að tala um einn dag :-)
Þannig að ef ég slepp núna næstu tvær vikur með því að hafa þessa elsku í gangi og gæta þess að slökkva ekki á henni, þá ætti hún að rúlla fram að páskum og þá hef ég öggulega tíma og dettur í hug er ekki til málæki sem er eitthvað á þessa leið: „Á morgun segir sá …“

2003-03-25T21:57:00.000-02:00

Varð fyrir því óhappi að ADSL-mótaldið hrundi í gær og uppgötvaði hversu háður maður er orðinn Netinu og öllu sem því fylgir. Þurfti að flytja með mér heim gögn og upphófst leit að disklingum til að vista á. Ekki tókst betur til þegar heim var komið að disklingadrifið las ekki disklinginn og þá kom að notum að vera með gamlan jálk sem les allt. Gat flutt skjalið þar inn og síðan nýtt LAN tenginguna á milli vélanna. Þvílík baktjaldaleið! Hvað um það nú er mótaldið komið í gagnið og sé ég fyrir mér helgina í því að endursetja vélina mína upp því viti menn það er komið svo mikið rusl inn á hana að hún kemur ekki til með að virka öðruvísi. Sonurinn var að vísu að mótmæla þessari fyrirhuguðu aðgerð því allir "seifuðu" leikirnir hans koma til með að gufa upp í meðförum móðurinnar :-)

2003-03-23T13:01:00.000-02:00

Sunnudagur
Hóf daginn með orkusöfnun. Fór í langan göngutúr, gekk hringinn í kringum Grafarvog í yndislegu veðri. Nú er komið að því að eyða orkunni og sitjum við Sólveig saman að verkefnavinnu.
Ekki er allt fengið með sjálfri vinnunni því skipulagningin er stór þáttur sem ekki skal vanmeta. Þá kemur í hugann orðatiltækið sem segir: „Hálfnað verk þá hafið er.“
Nú er fyrsti dagurinn á árinu þar sem dagur er lengri en nótt og tökum við mið af þessu í yfirfærðri merkingu og vonum að birtan leiði okkur áfram yfir hjallana framundan.

2003-03-21T10:28:00.000-02:00

Upp er runninn föstudagur ákaflega skýr og fagur - þó röndóttur. Þetta lýsir þessum ágæta degi í tvíræðri merkingu þar sem ýmist hefur skinið sól eða él skollið á. Sama má segja um mig þar sem ég var svo óheppin að fá ælupest og þá er líðanin svipuð og veðurlagið, það gengur á með skini og skúrum.
Er þessa dagana að reyna að hugsa tvennt í einu; klára þennan áfanga sómasamlega og hvernig verður sumarið. Nóg um það ég held að það sé kominn tími á skúr hjá mér og ég skelli mér undir sæng aftur.

2003-03-16T23:42:00.000-02:00

Ráðstefnurnar um upplýsingatækni í skólastarfi hafa verið haldnar árlega frá árinu 1999. Núverandi ráðstefna, UT-2003, var haldin dagana 28. febrúar til 1. mars sl. í Verkmenntaskólanum á Akureyri undir eftirfarandi yfirskrift:
„ER EKKI KOMINN TÍMI TIL …
… að allir njóti tækifæranna
… að byggja á reynslunni
… að taka til hendinni“

Eins og undanförnum UT-ráðstefnum var fjölmargt í boði, s.s. fyrirlestrar, málstofur og sýnistofur. Einnig kynntu fyrirtæki og stofnanir ýmislegt er lýtur að upplýsingatækni í skólastarfi. Erfitt var að velja á milli þeirra 14 atriða sem voru í boði hverju sinni en n hvert atriði stóð yfir í u.þ.b. 50 mínútur en síðan var gert 10 mínútna hlé á milli. Því miður var hver fyrirlestur fluttur einungis einu sinni en að mínu mati hefði verið æskilegra að hafa fyrirlestrana styttri og endurflytja þannig að fleiri gætu nýtt sér þá. Það sama gildir um málstofurnar sem þar að auki buðu upp á takmarkaðan fjölda þátttakanda. Því má segja að fjöldi athyglisveðra fyrirlestra og málstofa hafi farið fyrir lítið þar sem ekki var um annað en að velja og hafna á annars kostnað.

Á föstudeginum sat ég fyrirlestur hjá Mark O'Brien , deildarforseta upplýsingatæknideildar Háskólans á Akureyri, sem fjallaði um:
The Ins and Outs of University Computer Science
This paper considers two issues relating to the teaching of computer science at university. Those issues are the characteristics of students who start a computer science degree, and the characteristics of those who graduate.
Í byrjun fyrirlestursins sagði Mark O'Brien fundargestum reynslusögu. Hann hafði verið fenginn til að taka við forritunarverki sem var komið á tíma og ekki sá fyrir endann á. Að baki lá 30 mánaða forritunarvinna og ekki var séð fyrir endann á verkefninu, en hann hafði 2 mánuði til að ljúka því. Mark sagðist hafa lagst undir feld í einn mánuð þ.e. hann lá og hugsaði um „þrautina“, reis upp og lauk forrituninni síðan á öðrum mánuði og skilaði því fullbúnu á réttum tíma. Hann sagði jafnframt að við (fundargestir) fengjum áframhaldið í næstu lotu.
Næst fjallaði Mark um þær áherslur sem hann lagði til grundvallar við skipulagningu á upplýsingatæknideild Háskólans á Akureyri og samsetningu námsins í tölvunarfræði (coputer science) við HA.

Áherslurnar eru: Á fyrsta ári er gunnurinn lagður með mikilli stærðfræði, forritun og enskukennslu enda fer allt námið fram á ensku.
Á öðru ári er kjarninn í náminu tekinn föstum tökum með því að kanna frumgerðir tölva, hvernig þær vinna og á hverju þær byggja. Þegar því er lokið er unnið markvisst að flóknari uppbyggingu. Mark sagði fundargestum það að eftir þetta innlegg séu margir nemenda hans mjög undrandi á einfaldleika tölvanna og fái af þeim sökum allt aðra sýn á þær.
Á þriðja ári er farið í markvissa uppbyggingu (advance) og nemendur nýta þær undirstöður sem komnar eru. Þegar því marki er náð eru nemendur komnir á þann stað að geta smíðað forrit á tveimur mánuðum í stað 30.

Hér var Mark kominn að þungamiðjunni í sínum fyrirlestri en það var hvernig nemendur hann vill fá til sín í HA og hvernig nemendur hann vill útskrifa.
Hans óskanemendur eru þeir sem hafa lagt stund á stærðfræði, tónlist og kunna öguð vinnubrögð. Að sjálfsögðu þarf þetta ekki allt að vera til staðar en hann vill ekki „nörd-a“.

Skilgreining Marks á nördum var sú að þar væru nemendur sem kynnu þetta allt. Þyrftu einungis formsins vegna að taka formlegt nám. Mark lýsti þeim sem góðum nemendum á fyrsta ári, þ.e. þeir kynnu að forrita, en að skila skýrslum og greina forrit það væri aukaatriði fyrir þá þar sem þess þyrfti ekki. Á öðru ári væru aðrir nemendur búnir að ná nördunum, nema nördarnir væru nú komnir eftir á í skýrsluskilum og greiningu því enn væri það aukaatriði í þeirra augum. Þá rennur upp þriðja árið og viti menn annað hvort stökkbreytast nördar yfir í venjulega nemendur eða þeir detta út. Eins og hann sagði þá er það ekki á færi nörda að skrifa forrit á tveimur mánuðum þeir gæfust upp eftir 30 því skipulagninguna vantar.

Það var einstaklega gaman að hlusta á Mark lýsa þessu ferli því það er nú svo að á öllum skólastigum eru nördar við lýði. Ég get að vísu tekið undir það með Mark að þar sem tölvur koma við sögu þá eru nördarnir flestir karlkyns en þó er það ekki algilt. Merkilegast fannst mér þó hversu mikla áherslu hann lagði á að hann vildi fá nemendur sem kynnu til verka, það þyrfti ekki að vera nein kunnátta í forritun til staðar, heldur að þau kynnu sjálfstæð og öguð vinnubrögð. Nemendur ættu að vera færir um að geta unnið dagleg verkefni sómasamlega, þ.e. hefðu á sínu valdi það sem við köllum alhliða tölvufærni og kynnu að nota helstu notendaforrit s.s. ritvinnslu og töflureikni.

Hugbúnaður fyrir skóla: Allt opið og ókeypis?
Svokallaður opinn hugbúnaður (open source) hefur verið áberandi í umræðunni undanfarið. Í þessari málstofu verður greint frá nýrri úttekt menntamálaráðuneytisins á hugbúnaðarmálum skóla. Talsmenn Microsoft, StarfOffice og Linux skiptast á skoðunum um hvaða hugbúnaður henti skólum best.
Þeir sem sátu fyrir svörum voru: Guðbrandur Örn Arnarson, markaðsstjóri
EJS hf. (StarOffice), Halldór Kristjánsson, framkvæmdastjóri Tölvu- og verkfræðiþjónustunnar, Elvar Þorkelsson, Tölvudreifingar (Office) og Arnór guðmundsson, menntamálaráðuneytinu.

Arnór Guðmundsson frá menntamálaráðuneytinu byrjaði á því að greina frá gildandi rammasamningi um hugbúnaðarkaup. Hann sagði frá því að ráðuneytið hefði fengið boð frá EJS um að nota StarOffice hugbúnaðinn endurgjaldslaust til skóla í stað þess að nota Office pakkann en fyrir hann þarf að borga leyfisgjald. Flestir skólar nýta sér rammasamninginn til að kaupa leyfin á Office hugbúnaðarpakkanum fyrir stórar fjárhæðir á ári. Arnór sagði að í framhaldi af þessu boði hefði ráðuneytið óskað eftir óháðri úttekt á stöðu leyfismála í hugbúnaði og vísaði máli sínu til Halldórs Kristjánssonar hjá Tölvu- og verkfræðiþjónustunni sem hafði framkvæmt könnunina fyrir menntamálaráðuneytið og skilað skýrslu þar að lútandi.

Í skýrslunni fjallaði Halldór um kosti og galla beggja hugbúnaðarpakkanna sem um ræddi, Office og StarOffice, samhæfni þeirra og sérstöður. Of langt mál er að fjalla nánar um það en niðurstöður Halldórs voru þær að ef um nýja stofnun væri að ræða þá myndi svara kostnaði að taka tilboðinu og nota StarOffice sem valkost frá upphafi en ekki skipta út þar sem Office hefði verið við lýði lengi.

Fjörugar umræður fylgdu í kjölfarið og svöruðu þeir sem sátu fyrir svörum vel og skilmerkilega. Talsvert var komið inn á hugbúnaðarstuld og voru fundarmenn flestir á því að það væri óæskileg þróun, en hún væri fylgifiskur þess háa verðs sem væri á hugbúnaði og einnig hversu ört hann breyttist. Það þyrfti að reyna að finna leiðir til að lækka þennan kostnað og lýstu ánægju sinni með nemendaleyfi á sem dæmi Office pakkanum en jafnframt áhyggjum af því hvað tæki við þegar námsmenn yrðu menn.

Hér má því segja að tekinn hafi verið púlsinn á því sem við búum við og ekkert dregið undan. Hugbúnaðarstuldur er viðvarandi vandamál og verður svo nema að hugarfar manna breytist, því eins og sagt var: Hver er munurinn á því að taka hugbúnað ófrjálsri hendi eða taka bækur eða eitthvað annað á sama hátt. Það er kallað þjófnaður. Dæmi svo hver um sig.

Fyrirlesturinn hjá Mark O'Brien var hin besta skemmtun. Málflutningur hans var lýsandi og það námsferli sem hann var að lýsa á ekki bara við háskólanemendur því svipuð lögmál gilda í flest allri kennslu og hafði ég einstaklega gaman af þeirri samsvörun sem ég gat yfirfært úr máli hans yfir á mína nemendur. Þó fyrirlesturinn væri fluttur á ensku kom það ekki að sök því Mark hreif áhorfendur með sér með líflegum málflutningi og látbragðsleik.

Málstofan var fróðleg og áhugavert verður að fylgjast með þessu framtaki menntamálaráðuneytisins að gera alhliða úttekt á hugbúnaði til nota skólum.

Ekki er hægt að ljúka þessum pistli nema að geta þess að þessi ráðstefna er kjörinn vettvangur fyrir aðila til að skiptast á skoðunum og reynslusögum. Það skilar árangri og víkkar sjóndeildarhringinn að sjá og heyra hvað aðrir eru að gera.

2003-03-15T10:40:00.000-02:00

Nú er laugardagshádegi og ég er búin að sitja í tíma frá kl. 8:30 og hlusta á Hilmar Þórðarson, kennara í Listaháskóla Íslands, fjalla um hljóð og hljóðvinnslu.
Það er skemmst frá því að segja að mín „hljóðlausu“ eyru eru kannski ekki svo slæm eða mítt lagleysi því eftir þennan fyrirlestur þá má sjá að ekki er allt sem sýnist og jafnvel hægt að taka upp hljóð og e.t.v. söng frá aðila sem mér og gera áheyrilegan. Það yrði nú saga til næsta bæjar :-)
Nú erum við Sólveig að fara í mat því það er mæst til þess að við nýtum það sem er boðið upp á svo að hægt verði að halda kaffiteríunni úti á laugardögum fyrir undanvillingana sem stunda nám um helgar.

2003-03-11T22:55:00.000-02:00

Enn einn dagur að kveldi (nóttu) kominn. Var að yfirfara punkta sem ég tók niður á UT2003 og reyna að koma þeim í heilsteypta mynd fyrir Láru. Vonandi klárast það á morgun. Einnig verið að reyna að setja upp útlínur fyrir heimasíðuverkefnið frá Láru sem á að vera búið nk. sunnudag og þar er ég í ritstoli enn sem komið er. Bíð eftir að andinn komi yfir.
Var að setja upp heimasíðu fyrir Átthagafélag Sléttuhrepps, fyrrum Aðalvíkursveit, en þaðan er móðir mín ættuð. Ég sit í stjórn félagsins og það stendur fyrir skemmtun nk. laugardagskvöld þannig að það hefur verið nóg að gera á þeim vettvangi líka. Set hér slóðina í heimasíðuna ef einhver skyldi vilja skoða.

2003-03-09T13:20:00.000-02:00

Ekki gat ég staðið við að gefa nánari lýsingu á „verkefnavinnunni“ heima hjá Ásrúnu sl. föstudagskvöld þar sem heilsan leyfði það ekki. Í stuttu máli þá má um kenna að frúnni varð það á að innbyrða u.þ.b. 3 glös af rauðvíni og þar með var næsti dagur að mestu helgaður rúminu. Ég hafði mig þó upp í það með herkjum að mæta á laugardagsvaktina í KHÍ og síðan lá leiðin heim undir sæng.
Yngsti sonurinn (16 ára) sá um matseldina og í beinu framhaldi af því ákvað frúin að helga fjölskyldunni restina af laugardagskvöldinu og sleppti allri verkefnavinnu þar með.
Hvað varðar væntanlega skýrslu úr boði Ásrúnar þá voru teknar myndir af vinnunni sem fram fór og verða þær settar á vefinn og hlekkur fyrir aðra til að skoða héðan úr blogger. Ég mætti með stafræna myndavél til að vera fær um að geta heimilda síðar meir og sem æfingu í myndvinnslu hér á námskeiðinu.

2003-03-07T17:25:00.000-02:00

Í dag kláraði ég námskeiðið „Vettvangsnám fyrir fartölvuleiðtoga“ undir umsjón Ásrúnar Matthíasdóttur. Hún var búin að skipuleggja daginn frá kl. 9–16 og meðal fyrirlesara var Salvör, kennarinn okkar hér :-)
Dagurinn var hinn mætasti þótt ég yrði að sinna veiku „barni“ þar sem einkadóttir mín, eins og hún vill gjanan vísa til þegar mikið liggur við, var lasin. Þegar svo stendur á er ágætt að beita móður fyrir sig þegar þarf að ná í lækni, en ég viðurkenni að mér fannst hálf kindarlegt þegar ég var búin að herja út neyðartíma fyrir hana á Háls-, nef- og eyrnadeildinni að gefa upp kennitölu barns sem er fætt 1978 og í ofanálag flutt að heiman. Hvað um það hún fékk góða meðhöndlun og ný lyf svo vonandi hressist hún von bráðar.
Seinnihlutinn af deginum var reglulega góður og margt fróðlegt sem kom fram í fyrirlestrunum. Fyrsti fyrirlesturinn var um höfundarétt og þar kom í ljós að ekkert má, allt háð leyfum. Næsti fyrirlesari var úr Borgarholtsskóla og þar snérist dæmið við, það var bara ekkert við þessu að gera annað en að taka efni af vefnum. Af þessu er ekki hægt að álykta annað en hver og einn verður að eiga við sig og sína samvisku hvað langt á að gana í að ná í efni af vel til eigin nota. Það dugar mér að taka slíkar ákvarðanir fyrir mig þó ég eftirláti öðrum að sjá um sig og er ég þá komin inn á annan fyrirlestur sem við fengum frá Námsráðgjöf HÍ en þar var m.a. þemað og þekkja sjálfan sig, styrk- og veikleika og sínar takmarkanir. Mjög fróðlegt og skemmtilegt.
Læt þetta duga í bili þar sem ég á að vera mætt í verkefnavinnu heim til Ásrúnar kl. 20. Þó það sé búið að afhenda skírteinin um að námskeiði sé lokið þá stóð víst eitthvað útaf og verður því lokið í kvöld. Okkur stendur m.a. til boða að ljúka því í heita pottinum hjá Ásrúnu og það er aldrlei að vita hvernig kvöldið endar. Sendi skýrslu um það á morgun.

2003-03-05T21:48:00.000-02:00

Þá er enn ein vika langt komin þrátt fyrir að hún var rétt að byrja og Akureyrarferðin ný afstaðin.
Þessi ráðstefna var mjög skemmtileg og fróðleg svo ekki sé talað um að þarna voru svo margir sem að maður þekkti úr bransanum :-)
Eins og alltaf vill verða voru erindin, málstofurnar og sýningarnar misjafnar en ég saknaði þess að geta ekki sótt fleiri. Þarna voru 14 atriði í gangi í einu og ef skipulagið hefði boðið upp á sem dæmi að hafa engan fyrirlestur lengri en 30 mín þá hefði verið hægt að keyra þá báða dagana og leyfa fleirum að njóta.
Hvað um það ég fór á fyrirlesturinn hjá Íranum, Mark O'Brien, sem veitir Tölvudeild Háskólans á Akureyri forstöðu. Hann fór á kostum og kem ég til með að skrifa um þann fyrirlestur.
Einnig sótti ég málstofu um „Hugbúnaður fyrir skóla: Allt opið og ókeypis?“ Þar var kynnt könnun sem Halldór Kristjánsson hafði unnið fyrir Menntamálaráðuneytið með það í huga að taka upp StarOffice hugbúnað í stað Office. Þar mættu forsvarsmenn Microsoft og StarOffice og sátu þeir allir fyrir svörum.
Við kellurnar höfðum það mjög gott í leiguíbúðinni og ákváðum að drífa okkur að versla á föstudagseftirmiða því það var hluti af því að vera á Akureyri að kíkja í búðir. Við versluðum svangar, en það er hvorki hollt né gott fyrir einstaklinginn hvað varðar aukningu þyngdar eða (þyngdr)tap í buddu. Afleiðingin varð sú að við keyptum talsverðan óþarfa og urðum að dröslast með afganginn heim en þá kom sér líka vel að vera og lifa eins og drottningar í útlendri borg og hafa bíl til umráða.
Læt ekki uppi hvað gert var restina af föstudagskvöldinu á Akureyri en það voru þreyttar konur sem komu heim til Reykjavíkur á laugardeginum. Rúmið var æskilegur kostur og má segja að það var rétt hægt að koma sér af stað í vinnu á mánudagsmorgunn.
Læt þetta duga í bili.

2003-02-27T23:46:00.000-02:00

Nú fer að líða að Akureyrarferð hópsins á UT 2003. Við verðum þrjár með íbúð þannig að það ætti ekki að vanta fjörið. Hvað um það ég hafði áætlað að afkasta ákveðnu verki í kvöld þ.e. fullvinna Vefrallý II en í staðinn aðstoðaði ég (einka)dóttur mína við bréfaskriftir hún er nú ekki nema 24 ára :-)
Restin af kvöldinu, fram til þess tíma er ég rita þessar línur, fór í að sitja yfir 16 ára syni mínum og aðstoða hann við að ljúka verkefni sem hann vildi setja upp í Power Point, setja á hreyfingar og sjálfvirkan tíma á sýninguna svo ekki er annað hægt að segja um mína eigin verkefnavinnu „Svona fór um sjóferð þá“. Það koma upp þessi andartök þar sem það verða hagsmunaárekstar á milli nemendanna á heimilinu og þá vægir sá sem vitið hefur meira :-)
Nú er best að drífa sig í háttinn svo næg orka verði til staðar fyrir Norðan.

2003-02-25T21:47:00.000-02:00

Kláraði nýja vefinn aðfararnótt mánudagsins, þ.e. ef hægt er að segja að einhver vefur sé kláraður, því það liggur í hlutarins eðli að hann þarf að vera í sífelldri endurmótun.
Þegar ég ætlaði að setja tilvísun í nýju aðalsíðuna þá lá bloggerinn niðri, um kl. 04:40 og eitt er víst að ég var ansi syfjuð í vinnunni daginn eftir :-)
Hvað um það ég eyddi tíma í að prófa að nota Library í Dreamweaver og mikið er það sniðugt að geta sett "fót" og síðan þegar næst er uppfært þá uppfæra eitt skjal og bingó allt breytist. Ég hafði notað þennan fídus áður þegar ég setti upp vef fyrir DKL en það er mesta furða hvað eyðist út af HD-diskum okkar þarna í toppstykkinu.
Tilvísun í nýju síðuna er hér til hliða undir NKN-Salvör.

2003-02-23T14:48:00.000-02:00

Sunnudagurinn hálfnaður en hafa ber í huga að hálfnað verk þá hafið er.
Þessi tilvísun er mér ákveðin huggun þá ekki sé verkið klárað, en kemst þó hægt fari.
Þessa stundina er heimasíðan mín í endurmótun því ekki veitti henni af andlitslyftingu. Hún verður því meira í takt við það sem við erum að sjá þessa dagana með tilheyrandi hnöppum og tilvísunum. Skrifaði í gær tæknisöguna og gerði yfirlit yfir nám og námskeið. Er einnig að velta fyrir mér hvort ég eigi að láta verða af því að hafa tilvísun í „privat“ fjölskyldu síðu en tek ákvörðun um það síðar. Hins vegar ætla ég að halda tenginu í áhugamálin sem eru helst ættfræðin og Aðalvíkin mín. Eftir að Íslendingavefurinn hans Kára kom upp þá fékk ég staðfest að við Salvör eigum sameiginlega formóður úr Aðalvíkinni.

2003-02-22T10:28:00.000-02:00

Loksins sest ég niður til að vinna skólaverkefni eftir annasama viku. Ég held ég þurfi að taka "námskeið" í tímastjórnun því greinilega er hann ekki mikill vinur minn, gufar upp og veitir ekki stuðning :-)
Þá er það næsta vers; renna yfir öll fyrirmæli sem hafa hlaðist upp (reyna að grynnka á bunkanum) og fylgja þeim út í ystu æsar.
Nánari skýrsla verður gefin á morgun um gang mála og nú vona ég bara að mér takist markmið (skammtíma) mitt að geta grillt í borðið fyrir bunkanum.
Nú líður að norðurferð og í morgun bauð ég Ingólfi að deila með okkur konunum náttstað, en nokkrar af okkur konunum vorum svo heppnar að ná í orlofsíbuð til að vera í meðan á UT ráðstefnunni stendur. Rétt er að taka fram að Ingólfur þáði ekki boðið, enda ekki víst að hann hefði lifað það af.
Nú er best að drífa sig í vinnu og svo …

2003-02-18T19:58:00.000-02:00

Þá er vefrallýið loksins komið á vefinn. Sólveig og ég fullunnum það í gær og settum á heimasíðurnar okkar. Það fjallar almennt um Þjóðarbókhlöðuna þ.e. Landsbókasafn Íslands – Háskólabókasafn og um leit í Gegni og +Greini. Við ætlum í beinu framhaldi að gera framhaldsrallý þar sem notkun þessara leitavéla verður æfð nánar. Eins og oft vill er tíminn sem notaður er í þessa ágætu verkefnavinnu sóttur í svefntímann þannig að ég drattaðist ekki í vinnu fyrr en kl. 8:30 í morgun í stað 7:45 og viti menn það er byrjað að birta.
Nú í kvöld ætla ég að vinna verkefni frá Braga í kúrsinum Margmiðlun og svo er að sjá hvernig það gengur og hvort ég næ að klára það áður en breski sakamálaþátturinn byrjar á eftir því ekki má missa af honum. Bretar eru sér á parti með sjónvarpsefni, allavega eru þeir í miklu uppáhaldi hjá mér.
Sjáumst og heyrumst fljótlega :-)

2003-02-16T14:41:00.000-02:00

Enn enn sunnudagurinn í verkefnavinnu. Hér sitjum við tvær, Sólveig Friðriksdóttir og ég til að undirbúa verkefnavinnu næstu viku.
Í gær hélt ég smá kynningu í opnu húsi KHÍ og var það mjög skemmtilegt að hitta svo marga úr náminu og taka stöðuna hjá hinum.
Salvör mætti og bjargaði blogginu mínu þannig að nú er hægt að blogga opinberlega áfram og tvinna saman við hugleiðingum um námsframvindu sem kannski mætti vera betri, en það er þetta með tímann, hvert skyldi hann hafa flogið?
Sjáumst hress og kát fljótlega.

2003-02-14T20:59:00.000-02:00

Kvennaboð Kvennaboð Ólafar
Hér eru nokkrar myndir úr afmælinu mínu sem haldið var 1. febrúar sl.

2003-02-14T20:56:00.000-02:00

Enn er ég úti í kuldanum og sama hvað ég geri. Reyni að setja krækju í myndasíðu frá „kvennapartíinu“.

2003-02-10T09:46:00.000-02:00

Ekki gengur að fá þetta virkt og því reyni ég að ná aftur í Salvöru og sjá hvað mér verður ágengt með hennar aðstoð. Annað sem er að frétta er að ég var að hugsa um að líta við á opna húsið á laugardaginn og spjalla vítt og breitt um vefsíður uppsetningar og læsileika. Ég get ekki boðið upp á neitt nema sjálfan mig þar sem það er búið að vera mikið at í vinnunni og þar af leiðandi ekki gefist tími til undirbúnings.
Sjáumst hress og kát á laugardaginn.

2003-02-09T15:15:00.000-02:00

Fylgdi leiðbeiningum um að setja upp vefleiðara vistaðann á mínu heimasvæði. Ég fékk tóman glugga þannig að ég lokaði þessum möguleika og kanna hann nánar síðar. Búin að sitja við bloggið í dag og læt þetta duga að sinni.
Kveðjur til allra (skóla/þjáningar systra og bræðra).

2003-02-09T13:40:00.000-02:00

Nú bætist skilaboðaguggi við herlegheitin og nú er að bíða og sjá hvort einhverjir bíta á agnið og senda mér línu :-)

2003-02-09T13:23:00.000-02:00

Henti út kóðanum fyrir tengla (náði í íslenskaðan kóða á teljari.is) og laut í lægra haldi fyrir enskunni því miður. Setti teljara inn og hann virkar.

2003-02-09T13:14:00.000-02:00

Tilraun til að setja íslensku á tengla sem gengur ekki og teljara.

2003-02-09T11:50:00.000-02:00

Smá breytinar í gangi

2003-02-09T11:22:00.000-02:00

Halló! Halló! Það eru þessi smáatriði sem eru að væflast fyrir manni. Um leið og ég sendi viðbót inn (þ.e. í skrifum) þá uppfærðist allt. Mér finnst það ekki rökrétt því ég las í fyrirmælum að það ætti að smella á hnapp sem heitir PUBLISH og hvað sem ég reyndi þá gerðist ekkert fyrr en kvörtunin fór á vefinn. Kannski skilja þeir íslensku - hver veit!

2003-02-09T11:20:00.000-02:00

Ég fór í gegnum ferlið að losa mig við auglýsingar og gaf upp viðeigandi kreditkortanúmer og því miður virðist sem eitthvað hafi farið úrskeiðis því ekki eru þær farnar enn. Einnig reyndi ég að breyta fyrirsögnum á síðunni en svo virðist sem það takist ekki heldur. Nú er að bíða og sjá. Ef ekkert gengur á morgun þá verð ég víst að senda póst á Blogger :-)

2003-02-09T10:46:00.000-02:00

Heil og sæl
Við yfirlestur á fyrirmælum Salvarar sá ég að út hafði fallið aðstæður í vinnu og verður reynt að bæta úr því hér sem og framtíðarsýninni. Í minni vinnu er stór þáttur vinna við tölvur. Notast er við ágætar PC vélar og stýrikerfið er NT4. Einnig er til staðar öll helstu jaðartæki, s.s. brennari, skanni, stafræn myndavél, myndvarpi o.s.frv. Hvað framtíðarsýn varðar þá er oft erfitt að gera sér grein fyrir henni þar sem tæknin sem við búum við hefur dunið á okkur sem „stafrænn stormsveipur“ sem lítt sér fyrir endann á. Það helsta sem segja má að komi til með að breytast í nánni framtíð er aukið aðgengi fjöldans að há-hraða tenginum enda er óraunhæft að vinna undir öðrum kringumstæðum eins og staðan er orðin.
Dagurinn í gær, laugardagurinn 8. febrúar fór í undirbúning og grunnvinnu á verkefnum sem liggja fyrir. Forritin sem eru komin á sinn stað eru prufukeyrð smátt og smátt og vondandi næst aukin færni með hverju skrefi.
Þar til í næsta sinn, kveðja
Ólöf

2003-02-05T22:23:00.000-02:00

Komið þið öll sæl og takk fyrir síðast.
Máltækið segir „Allt er fimmtugum fært“ og með það í huga hef ég mín skrif sem koma allt of seint en ástæðan fyrir því er sú að ég var fimmtug þriðjudaginn 28. janúar sl. og hélt upp á það sl. laugardag. Sú vika fór að mestu í undirbúning fyrir kvennapartíið en 75 konum var boðið og 61 sáu sér fært að mæta. Til að koma í veg fyrir að hópurinn yrði of einsleitur var karlpeningur fenginn til að „þjóna“ og tókst þeim það einstaklega vel eins og vænta mátti.
Nánari skýrsla um afmælið, sem stóð yfir frá kl. 16 til miðnættis, verður birt á heimasíðu minni en þar hef ég hugsað mér að setja myndir sem voru teknar og sýna herlegheitin. Hvað um það þetta var yndislegt og alla vega ég skemmti mér konunglega.

Nú er komið að því að byrja vinna upp slugsið á þessari vígstöð, setja skemmanir í bið, og ná ykkur hinum :-)

Varðandi tæknimál á mínum bæ þá er ég með tvær PC tölvur. Eina gamla Daewoo og aðra samsetta sem fékk andlitslyftingu fyrir rúmu ári. Örgjörvinn er 1 GIG , tveir diskar 6 og 25 GIG og 17" Sony Triniton skjár sem notast við GForce skjákort, DVD og brennari. Önnur jaðartæki eru Epson prentari, USB ADSL mótald, Heidelberg skanni sem skannar inn myndir, negatívur og slides. Einnig er til stafræn myndavél, Canon G2 og er notast við USB tengi til að hlaða niður á tölvuna. Vélin notar minniskort og til eru fjögur kort frá 32 til 128 Mb.

Á heimilinu búa fjórar manneskjur, þ.e. við hjónin og tveir synir okkar (27 og 16 ára) og GSM símaeign er samtals 5 símar því allur er varinn góður ef eitthvað skyldi koma upp á! Ég tek það fram að ég á einungis eitt eintak af þessu annars ágæta tæki :-)
Læt þetta duga um tæknimálin í bili.

Hvað varðar VEFRALLÍIÐ þá hef ég í huga að fjalla um leitarvélarnar GEGNI og GREINI. Nánari útfærsla er í fæðingu en hugmyndin kom þegar Sólveig Friðriksdóttir og ég lögðum fyrir nemendur í FB spurningakönnun sl. haust þar sem m.a. var spurt um GEGNI og GREINI. Í ljós kom að meirihlutinn hafði ekki heyrt á þá minnst hvað þá heldur til hvers þeir væru notaðir.

Nú læt ég þessu lokið í bili og býð góða nótt að sinni.

2003-01-18T11:32:00.000-02:00

Nú ætla ég að setja link inn frá blogg-síðunni hans Eyþórs

2003-01-18T11:26:00.000-02:00

Nú er best að gera tengingu í heimasíðuna mína

2003-01-18T11:25:00.000-02:00

Þar sem allur bekkurinn er að búa til blogg-síður þá er þetta nokkuð seinvirkt.

2003-01-18T11:19:00.000-02:00

Þessi bloggsíða var búin til laugardaginn 18. janúar 2003 undir leiðsögn Salvarar á námskeiðinu „Nám og kennsla á Netinu – Vorönn 2003“